Umujyanama mu ikoreshwa ry’ikoranabuhanga muri PSI, Andrea Novella yagaragaje ko abagore n’abakobwa bafite imbaraga n’ubushobozi muri bo, igikenewe kikaba ari uko bahabwa urubuga ndetse bagashyigikirwa kugira ngo babigaragaze bityo batange umusanzu wabo mu iterambere ry’ibihugu byabo.
Andrea Novella yabigarutseho mu kiganiro yatangiye mu nama Mpuzamahanga yiga ku Iterambere ry’uburinganire n’imibereho myiza y’abagore (Women Deliver) yabereye Kigali.
Ni ikiganiro cyagarukaga ku nsanganyamatsiko ijyanye no gushyiraho uburyo buha umugore urubuga rwo guhanga udushya no gufata ibyemezo biganisha ku buzima bwiza.
Yavuze ko ari byiza kuba abagore n’abakobwa baturutse imihanda yose bateraniye i Kigali baganira ku ruhare rwabo mu Iterambere ndetse agaragaza ko abagore n’abakobwa bakeneye ubufatanye no gushyigikirwa kuko bafite imbaraga n’ubushobozi.
Yagize ati “Rero, turavuga ku byerekeye gushyigikira abagore no kubaha ubufasha bakeneye kugirango babashe kugaragaza imbaraga n’ubushobozi bwabo. Mu yandi magambo nicyo kintu cya mbere nashakaga kugaragaza, nuko igikenwe ari ukuduha urubuga ibikoresho n’ibyangombwa nkenerwa nk’abagore n’abakobwa kugira ngo tubashe gukoresha imbaraga zacu.”
Yanavuze ku ngingo yo gukuraho inzitizi zijyanye no kuboneza urubyaro hatitawe aho umuntu aherereye, imyaka ye, igitsina, irangamimerere cyangwa imiterere y’umubiri (FP2030) yemeza ko abagore aribo bakwiye guhitamo ibikorerwa ku mibiri yabo.
Ati “Byose ni ibijyanye n’umubiri n’ubuzima bw’imyororokere. Ese hari ibazo Bihari? Ese ibyo bibazo ni ibihe bibangamiye ubwo bushobozi. Yego ikibazo nyamukuru ni uburyo tubona amakuru n’uburyo tubona ubufasha no kwitabwaho muri izo serivisi.”
Umuyobozi w’Ikigo Mpuzamahanga cyita ku buzima binyuze muri Siyansi (Management Sciences for Health: MSH), Marian Wentworth,asanga ikigomba gukorwa kugira ngo ibyifuzwa byose bigerweho ari uguharanira ko abagore bajya mu nzego zifata ibyemezo.
Ati “Mbere na mbere nk’umuyobozi w’umuryango mpuzamahanga utari uwa leta numva ko ari ingenzi gufasha abandi bagore kujya mu nzego z’ubuyobozi. Ku Isi 72% by’abakozi ni abagore ariko 25% nibo bagore bari mu buyobozi gusa. Bivuze ngo gushyigikira abagore baharanira kujya mu buyobozi mu rwego rw’ubuzima, kuri njye ni ingenzi cyane.”
Kuboneza urubyaro ni ingingo itaravuzweho rumwe mu bihugu bimwe na bimwe. Mu 2018, mu Rwanda ubwo hazamurwaga amajwi y’abasaba ko abangavu n’ingimbi bakwemererwa guhabwa serivisi zirimo izo kuboneza urubyaro, Kiliziya Gatolika yahise igaragaza ko itewe impungenge no kuba abangavu n’ingimbi bakomorerwa kuri izo serivisi kuko byakongera ubwomanzi n’uburaya.
Mu mwaka ushize Inteko rusange y’Abadepite yanze gutora ishingiro ry’umushinga w’itegeko ryerekeye kwemerere abangavu bagejeje imyaka 15 kuboneza urubyaro basaba ibiganiro bihuza inzego zose bireba.
Iri tegeko ryasesenguwe n’abagize Inteko Rusange y’Umutwe w’Abadepite ku wa 17 Ukwakira 2022, aho muri bo abagera kuri 30 batoye umwanzuro w’uko badashyigikiye uwo mushinga.
Inama ya women deliver iherutse kubera Ikigali mu Rwanda ikaba yarahurije hamwe abarenga 6000 baturutse hirya no hino ku Isi. Ifatwa nk’urubuga rwo kurebera hamwe uruhare rw’abagore mu iterambere ry’aho baherereye no gufata ingamba zatuma rugaragara hagaragazwa inzitizi bahura nazo.
Guhabwa urubuga no kujya mu buyobozi byagaragajwe nk’ipfundo ryatuma abagore bagira uruhare mu iterambere
Mukanyandwi Marie Louise.