Home IYOBOKAMANA Ibintu 5 Abapasteri bagomba kumenya ku bagore mu itorero.

Ibintu 5 Abapasteri bagomba kumenya ku bagore mu itorero.

August 22, 2017

“Uyu mwandiko nawanditse nyuma y’ikiganiro nagiranye n’umupasteri w’itorero ntavuze hano , akaba yarantakiraga ambwira ukuntu itorero rye ryari ririmo gusubira inyuma, ariko cyane cyane uyu mukozi w’Imana yambwiraga ubwumvikane buke yari afitanye n’abagore bo mu itorero rye. Ibi bintu ntabwo biri kuri uyu mu Pasteri gusa ahubwo bigaragara mu bakozi b’Imana benshi.” Uyu ni Dr Debollah Waterbury, umuyobozi wa Ministeri,”Love Everlasting Ministries” akaba n’umwanditsi w’ibitabo, avuga ahugurira abapasteri kumenya ubutunzi buri mu bagore akabukoresha.
“Mu nyigisho mpuguro Paulo yatanze muri Tito, Paulo yafataga umugore nk’umuntu ushinzwe gucunga urugo(manager). Ubundi umugore rero ku bw’impano yahawe yo kumenya gucunga urugo, ntibigarukira mu rugo gusa ahubwo , Abapasteri baba bakwiye kumenya uko iyo mpano yarenga imbibe z’urugo ikagenda ikagira umumaro mw’itorero.
Hano hari ibintu 5 Abapasteri bakwiye kumenya ku bagore, ngo bitange umusaruro, hirindwe no kutumvikana. Dore ibyo abagore bifuza ku bapasteri:

Pasteri ,twumve.

Pasteri iyo umugore aje kukureba aba ashaka kugira icyo akubwira ariko aba akeneye nuko umwumva. Nta kintu kibabaza umugore nko kumwereka ko utamwumva, ibyo bigatuma abona ko akubereye umutwaro, kandi nta mwanya ufite wo gutakaza kuri we.
2.Duhe agaciro.
Nkuko nabivuze mbere , abagore bafite impano zihariye zo kumenya gucunga ibintu , iyo mpano yakora neza no mu rusengero. Ariko iyo ufashe umugore ukamushyira mu yindi mirimo nko kurinda abana, kubera gusa ko ari umugore, hari umurimo ufite agaciro kurushaho uba umutesheje wakagize akamaro mw’itorero. Sinshaka kuvuga ko kwita kuri abo bana bato bidafite akamaro, hari abagore ndetse n’abagabo benshi bahamagariwe koko uwo murimo, ariko hari n’abandi bagore benshi batabihamagariwe.
Iyo umu Pasteri ashyizeho itangazo mu itorero rihamagarira abagore guteka no kurinda abana; akerekana ko ari icyo bahamagariwe gusa; aba adahaye agaciro abigisha b’ijambo, ababwirizabutumwa, abanyamasengesho y’urugamba rw’umwuka, b’abagore bari mu itorero. Bibiliya ivuga yeruye ko impano zahawe bose nta kurobanura. Niba Imana yarahaye abagore, mu buryo bwihariye, impano yo gucunga; Pasteri utabitaho sinzi uburyo acunga itorero rye muburyo butanga umusaruro.
3.Duhe ibyo dukeneye mu murimo.
Abagore nabo bagomba gutegurirwa amasomo ya Bibiliya, n’andi mahugurwa kimwe n’abagabo. Kujya mu biterane, no mu mwiherero(conferences, retreats) kimwe nkabo. Nkuko abagabo bumva kurushaho iyo babwirijwe n’umugabo niko n’abagore bumva kurushaho iyo babwirijwe n’umugore. Ikintu rero cyo kugenera abagore inyigisho zirebana n’iby’abagore gusa,n’ibyo kurera abana izindi nyigisho zose zigaharirwa abagabo; si cyiza. Abagore nabo bahabwe kwigisha n’ibindi byose.

Garagaza ko ubona ibyiza twakoze unabidushimira.

Mu gihe umugore yagaragaje gukora imirimo neza , byaba byiza Umuyobozi agaragaje ko abibona akabimushimira. Uwo muco wo gushima Pasteri ntabwo agomba kuwugaragariza abagore gusa, oya n’abagabo bakwiye gushimwa, ariko akenshi aba baba basanzwe bumva iryo shimwe kuko kenshi Pasteri aba ashima nk’ibyiza byakozwe n’abakuru b’itorero(Abagabo) mu itorero.
5.Dukoreshe.
Abagore mu itorero si ikibazo ahubwo ni igisubizo cy’ibibazo. Abagore bashobora kuba babona ibisubizo by’ibibazo biri mu itorero , kurusha uko abagabo babibona. Kubera amarangamutima yacu yihariye , hari aho dushobora gutanga ubufasha kuruta uko abagabo babikora. Iyo udakoresheje abagore bari mu itorero mu buryo bugaragara, icyo wikururiye ni ukubatera kutishima kandi ukaba witesheje akamaro byazanira itorero.
Dukoreshe, dufite byinshi twatanga, ubushishozi n’ubwenge twagaragaza. Nta busumbane buri hagati y’abagabo n’abagore, ahubwo baruzuzanya. Iterambere ry’itorero ryawe rishobora kuzaturuka ku buryo uzaba ukoresheje abagore bari mu itorero ryawe. Uko ubitayeho bishobora kugirana isano no gutunga itorero rifite ubuzima bwuzuye.
Dr Deborah Waterbury,
Byahinduwe na,

MITALI Adolphe.