Mugihe shampiona iri gukinwa ku munsi wa 27, habura imikino 3 ngo ikipe itwaye igikombe imenyekane, Rayon sports nayo yagarutse mu zihatanira igikombe.
Apr fc na kiyovu sports ziyoboye urutonde rw’agateganyo rwa shampiona y’u Rwanda, kuri uyu wa gatandatu zagombaga gukora ibishoboka ngo zikomeze kwiharira amahirwe yo kwegukana igikombe cya shampiona hagati yazo.
Ikipe ya Apr fc yari yakiriye ikipe ya As Kigali, mugihe ikipe ya kiyovu sports yari yakiriye ikipe ya Mukura Victory et Loisure.
Kwisobanura hagati ya Kiyovu sports iyoboye urutonde rwa shampiona na Mukura Victory et Loisure, kwananiranye amakipe yombi agwa miswi kuri stade ya Muhanga, ntayanduje izamu ry’indi.
Mu Bugesera naho ikipe ya As Kigali yabanje igitego mu izamu rya Apr fc kuri penaliti yatewe na Shabalala, Umunyezamu awukuramo ugaruka kuri Shabalala atsinda igitego, Kuri penaliti yinjijwe neza na Fitina Ombolenga, Apr fc yishyuye igitego yari yatsinzwe.
Kunganya kw’aya makipe kwashyize ikipe ya Rayon sports mu byizerwa nyuma y’uko yasaga nkiyataye ikizere, yongeye kwinjira mu zihatanira igikombe cya shampiona.
Mu mibare ikipe ya Rayon sports irasabwa kubona amanota 3 yo kuri iki cyumweru , bihita biyishyira ku mwanya wa 2.
Kuri ubu, urutonde rwa shampiona ruyobowe na kiyovu sports n’amanota 57, ikurikiwe na Apr fc ifite amanota 54, ikipe ya Rayon sports ikurikiraho ku mwanya wa 3 n’amanota 52 igifite umukino izakina.
Mugihe ikipe ya Rayon sports yatsindaga ikipe ya Espoir zifitanye umukino kuri iki cyumweru, igasigara irushwa na kiyovu sports ya mbere amanota 2, ihite ifata umwanya wa 2.
NSENGIYUMVA JEAN MARIE VIANNEY
