Abari basanzwe ari banyiri ikipe ya Manchester United, bayishyize ku isoko bashyiraho n’igicuro cy’uwaba yifuza kugura iyi kipe.
Iyi kipe yashyizwe ku Isoko na The Glazers yari iyimaranye imyaka 17. Avram na Joel Glazer bari basanzwe ari ba nyiri iyi kipe ya Manchester united, batangaje ko abifuza kugura iyi kipe bakwishyura asaga miliyali 6 z’ama pound.
Abafana ba Manchester United bamaze imyaka myinshi bifuza ko aba baherwe barekura ikipe yabo kubera ko nta musaruro mu kibuga bayihaye uko babyifuza.
Abagaragaje ko bifuza kugura iyi kipe, hasigayemo ibikomerezwa 2 aribo tugiye kureba muri rusange.
Sheikh Jassim Bin Hamad Al Thani
Sheikh wa Qatari ni umuyobozi wa banki ya kiyisilamu ya Qatar, imwe mu mabanki akomeye mu gihugu cye. Se Hamad Bin Jassim Bin Jaber Al Thani yahoze ari Minisitiri w’intebe w’icyo gihugu cyo mu burasirazuba bwo hagati. Nta makuru menshi kuri we, kuko ntabwo akunda kugaragara mu ruhame, ariko yize amashuri acumbikirwamo abanyeshuri mu Bwongereza nyuma ajya mu ishuri rya gisirikare rya Royal Academy i Sandhurst, muri icyo gihe niho byagaragaye ko akunda Manchester United.
Mu gihe hari impaka zikomeje kuba nyishi ko Leta ifitemo akaboko muri iyi kipe, Sheikh Jassim, abinyujije muri foundation ye, yatanze icyifuzo cye ndetse atanga igiciro(bid) yifuza kuguraho iyi kipe ya Manchester united. Yizeza abakunzi b’iyi kipe ko azishyura imyenda yose kandi agashora imari muri iyo kipe ndetse n’ibikorwa remezo no gutera inkunga abaturage.
Sir Jim Ratcliffe
Uyu muherwe ufite imyaka 70 wavukiye muri Manchester, ni umwe mu bantu bakize cyane mu Bwongereza, akaba afite umutungo bwite ungana na Miliyari 6 mu ma paund. Kuva mu bwana bwe yari umufana wa Manchester United. Yashinze uruganda rukora imiti INEOS mu 1998 kandi Akurikirana iterambere ryarwo, aho rwaje guhinduka isosiyete ifite agaciro ka Miliyali 50 z’amapound. Ishyaka rye muri siporo ryamenyekanye cyane mu myaka yashize, aho afite ikipe yo muri Ligue 1 yo mu Bufaransa ya Nice na FC Lausanne-Sport yo mu Busuwisi, ndetse n’ikipe y’amagare Ineos Grenadiers.
Umwaka ushize yatanze icyifuzo cyo kugura Chelsea, aho yigeze kugura itike yigihembwe (season ticket), ariko amaherezo yatsinzwe n’umunyamerika Todd Boehly.
Kanda hano, usure izindi nkuru zacu mu mashusho
NSENGIYUMVA JEAN MARIE VIANNEY
