Nyuma y’igihe kitari gito shampiyona ikunzwe kurusha andi mashampiyona ku isi yose idakinwa kubera icyorezo cya Covid 19, ubu iyi shampiyona byemejwe ko izasubukurwa ku wa 17 Kamena 2020.
Iyi shampiyona izwi ku izina rya Premier League yahagaritswe kuva tariki 13 werurwe 2020 kubera icyorezo cyayogoje isi cya Covid 19, ubu byamaze kwemezwa ko izasubukurwa kuwa 17 Kamena 2020, ndetse inashyiraho ingengabihe y’uko amakipe azahura.
Imikino isigaye uko ari 92 yose hamwe, izakinwa nta mufana n’umwe uri mu kibuga ku mpamvu zo kwirinda ikwirakwiza rya Covid 19, ikazerekanwa n’amashene ya Televiziyo akurikira: Sky Sport, BT Sport, BBC Sport na Amazon Prime.
Uretse kandi imikino ya shampiyona izasubukurwa, hazanasubukurwa imikino y’igikombe cy’ishyirahamwe ry’umupira w’amaguru muri icyo gihugu cy’Ubwongereza kizwi ku izina rya FA Cup, kikaba cyo kizakinwa hagati ya tariki 27 na 28 Kanama 2020.
Mu mikino iteganyijwe ku ikubitiro mu isubukurwa rya shampiyona ihatse izindi mu gukundwa ku isi mu mupira w’amaguru, harimo umukino karundura uzahuza ikipe ya Manchester City iri ku mwanya wa kabiri ku rutonde rw’agateganyo rwa Premier League, izacakirana n’ikipe ya Arsenal FC ifite abakunzi batari bacye hano mu Rwanda barangajwe imbere n’umufana w’imena wayo kuva cyera, Nyakubahwa Perezida wa Repubulika Paul Kagame. Iyi kipe ya Arsenal ikaba ubu iri ku mwanya wa 9, aho irushwa amanota 17 yose n’ikipe bizacakirana ya Manchester city, ikarushwa amanota 42 yose n’ikipe yicaye ku mwanya wa mbere kugeza ubu ariyo Liverpool FC. Uyu mukino ukazaba ku itariki ya 17 Kamena ku isaha ya saa tatu n’iminota 45 ku isaha ya hano I Kigali, ukazabanzirizwa n’uwuzahuza Aston Villa izakina na Shiffield United ku isaha ya saa moya zuzuye isaha ya Kigali.
Tubibutse ko amakipe 4 ya mbere ari: Liverpool, Manchester City, Leicester City na Chelsea.
Imyanya itatu ya nyuma iriho AFC Bournemouth, Aston Villa,ndetse na Norwich City iri ku mwanya wa nyuma.
Titi Leopold
