kuri uyu wa gatanu w’icyumweru dusoje nibwo umutwe wa M23 wafashe ‘centre’ ya Masisi, Umuryango w’Ubumwe bw’Uburayi (EU) ukaba uvuga ko ifatwa rya Masisi ribangamiye cyane umuhate wo kurangiza intambara mu mahoro ndetse ko ari ingenzi ko impande ziri mu ntambara zihagarika imirwano zigashyira mu ngiro vuba ibyemezo n’ibyo ziyemeje muri gahunda ya Luanda uyu muryango uvuga ko ushyigikiye.
Nyuma yuko ufashe ‘centre’ ya Masisi ku wa gatandatu, umuvugizi wawo Lawrence Kanyuka yatangaje ku rubuga nkoranyambaga X ko wiyemeje “gucunga umutekano w’ibice byose byabohowe no kurinda abaturage bose n’ibyabo”.
Umuryango w’Ubumwe bw’Uburayi (EU) wasabye umutwe wa M23 kuva muri uwo mujyi no kubahiriza agahenge mu buryo bwuzuye, ikanasaba u Rwanda kureka ubufatanye bwarwo na M23 no gukura ingabo zarwo ku butaka bwa RDC.
Ikinyamakuru BBC dukesha iyi nkuru kivuga ko kugeza ubu nta cyo umutwe wa M23 wari watangaza ku mugaragaro kuri iri tangazo rya EU ariko mu gihe cyashize wagiye uvuga ko icyo ukora gusa ari ukwirwanaho iyo utewe n’ingabo za leta ya Congo (FARDC) n’abafatanyabikorwa bazo.
Ibi bikaba bibaye nyuma y’Inama yari yitezwe cyane mu kwezi gushize i Luanda muri Angola hagati ya Perezida wa RDC Félix Tshisekedi na Perezida w’u Rwanda Paul Kagame, yari yitezwe kugeza ku masezerano y’amahoro, ntiyabaye ku munota wa nyuma, kuko impande zombi zitumvikanye ku ngingo y’ibiganiro hagati ya RDC na M23.
Ni kenshi Umuryango w’Ubumwe bw’Uburayi (UE) wagiye usaba RDC kureka ubufatanye ubwo ari bwo bwose n’umutwe wa FDLR w’inyeshyamba z’Abanyarwanda zirwanya ubutegetsi bwa Kigali, zikorera mu burasirazuba bwa Congo, no kureka ubufatanye n’indi mitwe yitwaje intwaro.
Iyi ntambara ikaba yarongeye kubura mu ntara ya Kivu ya Ruguru mu burasirazuba rwa Congo hagati y’ingabo za Congo n’inyeshyamba za M23 kuva mu mpera y’umwaka wa 2021.
Ubu M23 igenzura ibice binini byo muri teritwari za Masisi na Rutshuru, n’ibice bimwe byo muri Walikale na Lubero, Umutwe wa M23 uvuga ko uharanira uburenganzira bwawo nk’Abanye-Congo, biganjemo abo mu bwoko bw’Abatutsi, uvuga ko bambuwe uburenganzira n’ubutegetsi bwa Kinshasa.
Nd. Bienvenu
