RDC: Abantu 17 baguye mu mpanuka y’indege

Abasivili n’abajenerali babiri bari mu bahitanywe n’impanuka y’indege y’igisirikare cya RDC, yabereye mu gace gatuwemo n’abaturage.

Nibura abantu 17, barimo abayobozi bakuru mu gisirikare, bahitanywe n’impanuka y’indege y’igisirikare cya Repubulika Iharanira Demokarasi ya Congo (RDC) yakoze mu majyepfo ashyira uburengerazuba bw’icyo gihugu.

Mu itangazo ryasohowe n’igisirikare cya RDC, cyatangaje ko muri abo bapfuye harimo abajenerali babiri bari mu butumwa bw’akazi. Abo ni Lieutenant General Joseph Mutombo, wari Perezida wa mbere w’Urukiko Rukuru rwa Gisirikare, na Lieutenant General Lucien-Rene Likulia, wari Umugenzuzi Mukuru w’Ingabo.

Iyo ndege yari ivuye mu mujyi wa Kikwit, mu majyepfo ashyira uburengerazuba, yerekeza i Kinshasa ku wa Gatanu tariki 25 Nzeri 2026, iza kugira ikibazo cya tekiniki bituma abari bayitwaye bagerageza kuyimanurira i Kenge, mu Ntara ya Kwango.

Remy Saki Bokinda, Visi Guverineri wa Kwango, yavuze ko i Kenge nta kibuga cy’indege cyo kuyimanuriramo cyari gihari, bityo iyo ndege ikagwa mu gace gatuwemo n’abaturage.

Yavuze ko nyuma yo kugwa hasi, iyo ndege yafashwe n’inkongi y’umuriro.

Mu gitondo cyo kuri uyu wa Gatandatu, Visi Guverineri yabwiye abanyamakuru ko umubare w’abapfuye wari wabanje gutangazwa ko ari 13, ariko nyuma y’uko umuriro wari wafashe ibisigazwa by’indege uzimijwe, abashinzwe ibikorwa by’ubutabazi basanze imibiri 16 y’abantu bakuru n’umubiri w’umwana. Ibyo byatumye umubare w’abahitanywe n’iyi mpanuka ugera kuri 17.

Ibiro bya Perezida wa RDC, mu butumwa byashyize ku mbuga nkoranyambaga, byatangaje ko Perezida Félix Tshisekedi yategetse inzego zibishinzwe gukora iperereza ryimbitse, kugira ngo hamenyekane neza uko impanuka yabaye n’impamvu yayo.

Perezida Tshisekedi kandi yihanganishije imiryango n’abavandimwe b’abahitanywe n’iyi mpanuka, ndetse n’inzego zose z’umutekano.