Abaturage bo mu Karere ka Rubavu Umurenge wa Mudende, bavuga ko nyuma yo gusobanukirwa ububi bwo gufumbiza umwanda wo mu musarane byagabanyije inzoka zo munda.
Aha ni hamwe mu hari haribasiwe n’inzoka zo munda ziterwa n’umwanda bakavuga ko mbere bajyaga barwaza inzoka zo munda cyane kuko ifumbire bakoreshaga mu gufumbira imyaka barya yaturukaga mu mwanda wo mu misarane( amabyi) ariko nyuma yaho RBC ibahuguriye ikabereka ububi bw’iyi fumbire bakareka kuyikoresha ubu inzoka zo munda zaragabanutse.
Bamwe mu bahinzi twaganiriye nabo bemeza ko bakoreshaga cyane iyo fumbire mu buhinzi batazi ububi bwayo ariko ubu bamaze kumenya ingaruka n’uruhare yagiraga mu gutuma barwaza inzoka barayireka.
Byiringiro Jean Claude ni umuhinzi wo mu Murenge wa Mudende mu kagari ka Mirindi ati” Ifumbire twayikoresheje igihe kirekire dutera ibirayi kuko nta bundi bujyanama twari dufite twabonaga byongera umusaruro aho haziye igikorwa cy’ubushakashatsi bw’inzoka zo munda baradusobanurira batubwira ko iyo fumbire yo mu musarane iyo igeze mu butaka haba harimo amagi y’inzoka amaramo imyaka 5 kabone n’iyo ku yindi sizoni utayikoresha ayo magi aba akirimo kandi ariyo atera inzoka zo munda turabyumva turayireka”
Abajyanama b’ubuzima bo muri uyu Murenge wa mudende bavuga ko byageze aho ibinini batangaga biba iby’ubusa ku nzoka zo munda biba ngombwa ko bahabwa ibindi bishobora guhangana nazo.
Nyirakagori Merciana wo mu kagali ka Mirindi umudugudu wa kiryoha mu Murenge wa Mudende ati” Hano mbere bakundaga guhingisha ifumbire bitaga saventi (umwanda wo mu musarane) rero amagi yavagamo n’ubwo atarava mu butaka neza nayo yongeraga ibyago by’ inzoka zo munda, zatumaga ibinini bya mbere bya Rubendazore twatangaga ntacyo bitanga, baduha ibindi binini bibirushije imbaraga turabitanga ari ko kugeza ubu abo twabihaye batubwira ko bameze neza kuri ubu kurwanya indwara y’ inzoka turi ku kigero gishimishije ”
Umuyobozi w’ikigo nderabuzima cya Mudende mu Karere ka Rubavu Mukaremera Valantine, yemeza ko ifumbire yo mu musarane yagiraga uruhare ku kigero kiri hejuru mu kongera inzoka zo munda ariko kuri ubu ibipimo byagiye bigabanuka
Ati” Mbere hari ikibazo gikomeye cyane cy’inzoka zo munda cyaterwaga n’uko abaturage bakoresha ifumbire ivuye mu musarane aho umushinga wa RBC utangiye gukorera mu umurenge wa Mudende ku kigero cya 99% izo nzoka zo munda zaragabanutse ku buryo no muri raporo dutanga usanga harimo impinduka haba ku baturage ku rwego rw’Akarere no ku rwego rw’ Igihugu kuko twatangaga raporo iteye ubwoba y’inzoka zo munda nko mu kwezi twashoboraga kwakira nk’abantu bari hagati ya 60-70 bafite ikibazo cy’inzoka zo munda ariko kuri ubu dushobora kubona nk’abantu 10 gusa bafite uburwayi bw’inzoka zo munda”
Hitiyaremye Nathan ukorera mu ishami rishinzwe kurwanya Malariya n’izindi ndwara zitandura mu gashami gashinzwe kurwanya indwara zititaweho uko bikwiye muri RBC avuga ko mu turere twakoreshaga ifumbire yo mu musarane n’inzoka zo munda ziri hejuru
Ati” Inzoka zo munda ni indwara akenshi iterwa n’umwanda ukaba uturuka ahantu henshi hatari mu ifumbire yo mu musarane gusa ahubwo n’ahandi wajya ugahura n’amabyi ushobora kwandura inzoka zo munda, imwe mu mpamvu ikomeye twabonye mu bushakashatsi twakoze ni uko mu turere twasanze dufite imikoreshereze y’ umwanda wo mu misarane n’inzoka zo munda ziri hejuru.”
Akomeza agaragaza ko muturere twakoreshaga ifumbire yo mu musarane na Rubavu iri ku isonga ariho n’ uyu murenge wa Mudende ubarizwa, RBC imaze gukora ubushakashatsi bwo kureba ko hakumirwa burundu inzoka zo munda muri Mudende, habaho kubakangurira kubaka ubwiherero, gukoresha amazi meza, ariko cyane cyane kubakangurira kuzibukira imikoreshereze y’ifumbire yo mu musarabe, ari nabyo byaragabanuye inzoka zo munda ku buryo bugaragara.
Dr Jule Mugabo Semahoro umukozi w’ishami ry’umuryango w’abibumbye ryita ku buzima rikaba umufatanya bikorwa wa Leta y’u Rwanda cyane cyane mu mikoranire na Minisiteri y’ubuzima n’ikigo cy’igihugu gishinzwe ubuzima RBC
Ati” Ishami ry’umuryango w’abibumbye ryita ku buzima ryashyizeho ingamba zo kurandura indwara zititaweho uko bikwiye dufasha leta gutegura igenamigambi no kurishyira mu bikorwa tukanabafasha ku bahugura ku bijyanye n’indwara zititaweho uko bikwiye niyo mpamvu twaje muri uyu mudugudu ahabaye ibikorwa by’indashyikirwa binyuze mu bushakashatsi binyuze mu kigo cy’igihugu gishinzwe ubizima gikora cyo gufasha abaturage ku gira isuku yaba mu mazi meza yo kunywa, ayo gukoresha bategura amafunguro n’ibinyobwa, hakaba kugira ubwiherero bwujuje ibyangombwa ndetse n’amazi iruhande rw’ubwiherero kugira ngo bakarabe bagire isuku igihe bamaze kwiherera tugafatanya mu gutanga ibinini bivura inzoka 2 mu mwaka nka WHO turi abafatanyabikorwa cyane cyane mu gikorwa cyo gutanga imiti harimo Albendazore, Mibendazore.Gufasha amavuriro yose yaba ibigo nderabuzima Centre de Sante yaba poste de Sante ibitaro by’uturere n’ibindi bitaro byose biri mu gihugu tukanafatanya guhugura abajyanama b’ubuzima uburyo barwanya indwara zititaweho”
Dr Jules akomeza avuga ko hazakomeza kubaho ubufatanye kuburyo mu myaka 5 irimbere zizaba zarandutse mu Rwanda.
Ati “Tuzakomeza gufatanya kugira ngo izo ndwara zive mu kiciro kitwa ko ari indwara zititaweho kuko iyo tuvuze indwara zititaweho si indwara ahubwo ni umuturage uba ataritaweho kandi ibyo binyuranye n’intego y’igihugu kuko intego ni umuturage kw’isonga, izi ndwara zikaba ziri gihindura isura ziva mu rwego rwo kuvuga ko zititaweho, ahubwo ziri kwitabwaho ku kigero cyiza kandi ko mu myaka 5 iri imbere zizaba zarandutse mu gihugu cy’u Rwanda “.
Imibare iva muri HMIS /Health Management Information System,(2023-2024) igaragaza ko Akarere ka Rubavu kari kuri 27% (ku mwanya wa 4 mu Turere twose)
Umuryango w’abibumbye ubarura indwara zititaweho uko bikwiye 21 harimo inzoka zo munda, ubumara bw’inzoka zo mugasozi, ibibembe…
Kugeza ubu ubushakashatsi buheruka mu bantu bakuru bari hejuru y’imyaka 16 bari kuri 46,1% mu bafite indwara y’inzoka naho ku bana bari ku myaka 5-15 bari kuri 38,7%, naho kuva k’ufite umwaka 1-4 bafite inzoka zo munda ku kigero cya 30,2%.
Mukanyandwi Marie Louise
