Tadej Pogačar yisubije icyubahiro i Kigali

Umunya-Slovenia, Tadej Pogačar, yisubije umudali wa Zahabu muri Shampiyona y’Isi y’Amagare, nyuma yo gutsinda isiganwa ry’abagabo ryo mu muhanda ryakinwe kuri iki Cyumweru, tariki ya 28 Nzeri 2025 i Kigali, aho yakoresheje amasaha atandatu, iminota 21 n’amasegonda 20 ku ntera y’ibilometero 267,5.

Pogačar yayoboye isiganwa habura ibilometero 104 ubwo yavaga mu gikundi, abakinnyi bari kuzamuka ahazwi nka Norvege.

Ni ku nshuro ya kabiri abikoze bikamuhira, aho mu 2024, i Zurich, na bwo yafashe icyo cyemezo hasigaye ibilometero 100, akegukana umudali wa Zahabu.

Umubiligi Remco Evenepoel wari wamukojeje isoni muri ‘ITT’ yakinwe ku munsi wa mbere i Kigali, yagize ikibazo cy’igare mu bilometero 75 bya nyuma, intera iriyongera, ndetse yongera kumukurikira mu bilometero 20 bya nyuma, ariko birangira atamushyikiriye, ahubwo hagumamo intera y’umunota n’amasegonda 28.

Umudali w’umwanya wa gatatu wegukanywe n’Umunya-Irlande, Ben Healy, wasizwe iminota ibiri n’amasegonda 16.

Mu bakinnyi 165 batangiye, hasoje 31 gusa ndetse nta Munyarwanda wasoje iri siganwa muri batandatu barikinnye.

Titi Léopold