Volleyball: APR na Kepler ziresurana ku mukino wa nyuma wo #Kwibuka32

Amakipe ya APR VC na Kepler VC mu bagabo ni yo yageze ku mukino wa nyuma w’irushanwa ngarukamwaka ryo Kwibuka Jenoside yakorewe Abatutsi mu 1994 (GMT), aho aya makipe aza guhura kuri iki Cyumweru tariki 21 Kamena 2026.

APR VC yageze kuri iyi ntambwe nyuma yo gutsinda REG VC amaseti 3-2, mu mukino wari urimo guhangana gukomeye, aho APR VC yabanje gutsinda iseti ya mbere 31-29, ariko amaseti abiri yakurikiye yegukanwa na REG VC (24-26, 24-25), naho amaseti abiri ya nyuma yegukanwa na APR VC (25-22,15-13), igera ku mukino wa nyuma ityo.

Wari umukino utoroshye na mba, cyane ko wanabayemo amakosa menshi, aho nka Kapiteni wa APR VC, Prince Kanamugire yahawe ikarita y’umutuku, kubera imyitwarire itari myiza yagaragaje mu kibuga.

Kepler VC yo yageze ku mukino wa nyuma bitayigoye na gato, kuko yihereranye Police VC iyitsinda amaseti 3-0 (25-23, 25-16, 25-16).

Uyu mukino wa nyuma uhuza APR VC na Kepler VC, uraba kuri iki Cyumweru saa kumi n’igice (4:30), ukabera kuri Petit Stade i Remera, nk’uko byatangajwe n’Ishyirahamwe ry’umukino wa Volleball mu Rwanda (FRVB).

Mu bagore, APR WVC ni yo yageze ku mukino wa nyuma, aho yabigezeho itsinze Police WC ivuye inyuma amaseti 3-2 (25-16, 25-20, 20-25, 27-29, 9-15).

APR WVC rero iraza guhura ku mukino wa nyuma na KPC (Kenya Pipeline) yo mu gihugu cya Kenya, ikaba yabigezeho itsinze Kepler WVC amaseti 2-3 (17-25, 25-21, 25-23, 21-25, 9-15), uyu mukino na wo urabera kuri Petit Stade saa munani (14:00).

Irushanwa ry’uyu mwaka ryatangiye ku itariki ya 19 Kamena rikaba risozwa kuri iki Cyumweru tariki 21 Kamena 2026, aho ryitabiriwe n’amakipe 6 mu bagore n’amakipe 8 mu bagabo, yo mu bihugu by’u Rwanda, Kenya, Uganda na Benin.