N’ubwo hari bamwe indwara y’ibibembe izahaza cyane, ndetse bamwe bagahorana n’ingaruka yabateye nyuma y’uko banavuwe. Abivuje kare, bavuga ko bakira ntube wanabimenya ko bigeze bayirwara.
Indwara y’ibibembe ni indwara yandura, cyakora abanduye bose siko barwara cyangwa se bagaragaza ibimenyetso. Uwanduye iyo agize ibyago akarwara, ibimenyetso bishobora kugaragara nyuma y’imyaka iri hagati y’5 na 20. Ibibembe biravurwa bigakira; ariko uwahuye n’ingaruka zabyo agomba kumenya uko abana nazo.
Ubusanzwe indwara y’ibibembe iterwa n’agakoko bita Bacille de Hansen. Aka gakoko gakunze kwibasira uruhu ari naho ibimenyetso bigaragara bwa mbere nk’ibara rimwe cyangwa menshi ataryaryata.
Bamwe mu barwaye ibibembe bavuga ko ibibembe iyo ubyivuje hakiri kare urakira.
Mukankwaya Seraphine wo mu kagali ka Nemba ni umubyeyi warwaye ibibembe ati” Nari mfite ibibara binini none nta bigihari ni amabara nari maranye imyaka ine ariko ubu nta kibazo ndi gukira”.
Byukusenge Esther wo mu Kagali ka Batima mu Murenge wa Rweru nawe warwaye indwara y’ ibibembe ati” Mu kirwa cya Mazane ni ahantu hakunze kugaragara iyi ndwara kandi niho nari ntuye nkimara kuyibona nahise ngana kwa muganga abaganga bakajya bankurikirana ndivuza ndakira n’ amabara arakira”.
Rukundo Pierre Celestin ukora ku Kigo nderabuzima cya Nzangwa mu karere ka Bugesera ushinzwe serivise y’ ibibembe n’ igituntu avuga ko iyi ndwara ivurwa igakira.
Ati” Ibibembe ni indwara tuvura igakira iyo tumubonye kare bifasha ko n’ ingaruka zabyo atari buzigire, ariko umuntu tubonye byarageze kure turamuvura agakira ariko ingaruka byateye zo arazigumana”
Nshimiyimana Kizito ukora mu ishami rishinzwe kurwanya indwara y’ igituntu n’izindi ndwara zifata mu buhumekero mu kigo cy’igihugu cy’ubuzima RBC avuga ko bageze ku kigero gishimishije mu kurwanya indwara y’ ibibembe
Ati” Birasaba y’ uko buri mwaka byibuze abaturage 10 bakagombye kubona munsi y’ umuntu 1 mu gihe cy’ umwaka, ubu rero twebwe aho turi kuri 0,02 ku bantu 10,000 bivuga ngo twageze ahantu hashimishije mu kurandura iyi ndwara igisigaye ni ubukangurambaga n’ ubufatanye kandi byose birashoboka”.
Muri 2017, hasuzumwe abarwayi 30. Icyagiye kigaragagara ni uko hejuru ya 27% bisuzumishe batinze, kuko bari baramaze kugira ubumuga bukomeye biturutse ku ngaruka ziterwa n’iyi ndwara.
Mu myaka 10 ishize mu kigo nderabuzima cya Nzangwa abavuwe indwara y’ibibembe bagakira ni 29 abakirwaye bari ku miti ni 5
Mu myaka itanu ishize, hagiye hagaragara hagati yabarwayi 30 na 40 buri mwaka.
Hagendewe ku bipimo bitangwa n’umuryango wita kubuzima (OMS), bivuga ko ibihugu biri mu nzira yo kurandura iyi ndwara, hagombye kugaragara nibura munsi y’umurwayi umwe buri mwaka mu baturage 10,000. Mu Rwanda iki gipimo cyagezweho, aho ibipimo bihagaze, 0.02 by’abarwayi ku baturage 10,000 mu gihe cy’umwaka.
Cyakora, nubwo bigaragara ko imibare igenda igabanuka ku buryo bushimishije indwara y’ibibembe iracyariho. Umwaka ushize (FY 2023-2024) abarwayi b’ibibembe bashyizwe ku miti bose hamwe bangana na 37, muribo 29 bari bafite ubwandu bushya, 8 abavuwe kera. Abana bari ku kigero cya 1/29 (3.4%), mu gihe cyose dufite abana bisobanuye ko ubwandu bukiri mu baturage. Abagaragaweho ubumuga bwakomotse ku ndwara y’ibibembe banganaga na 14% (4/29) mu gihe bagombye kuba ari munsi ya 10%. Umuntu usuzumwe afite ubumuga, bivuze ko uburwayi bwabonetse butinze, benshi muribo baba banduza. Indwara y’ibibembe iravurwa igakira, imiti ni ubuntu.
Mukanyandwi Marie Louise.
