Ibihano ntibyigeze bikemura ibibazo, akenshi bituma ibintu birushaho kuba bibi-Perezida Kagame

Perezida Paul Kagame avuga ko mu mateka ibihano bitigeze bikemura ibibazo, ahubwo ko akenshi bituma ibintu birushaho kuba bibi, mu gihe hashakishwa ibisubizo by’ibibazo bya politiki n’iby’umutekano.

Ibi Umukuru w’Igihugu yabikomojeho kuri uyu wa Gatanu tariki 17 Nyakanga 2026, ubwo yagezaga ijambo ku bitabiriye inama ya Biro Politiki ya FPR Inkotanyi, yigaga ku cyerekezo cy’uyu Muryango mu myaka 30 iri imbere.

Perezida Kagame yavuze ko u Rwanda rumaze igihe rufatirwa ibihano n’ibihugu bimwe na bimwe ndetse n’imiryango mpuzamahanga, nyamara ibyo bitigeze bihindura ukuri ku bibazo biri mu karere.

Yagize ati “Iyo witegereje amateka, ibihano ntibyigeze bikemura ibibazo. Akenshi bituma ibintu birushaho kuba bibi, kuko aho gukemura ikibazo nyir’izina, biba bihindutse igikoresho cya politiki.”

Yunzemo ko ikibazo cy’umutekano muke mu Burasirazuba bwa Repubulika Iharanira Demokarasi ya Congo kimaze imyaka myinshi, ku buryo kidashobora gukemurwa no gushinja uruhande rumwe cyangwa kurufatira ibihano.

Yavuze kandi ko hari igihe ibihugu bikomeye bifata ibyemezo bishingiye ku nyungu zabyo za politiki, aho kubanza gusuzuma neza ingaruka bishobora kugira ku baturage ndetse no ku mutekano w’akarere.

Perezida Kagame yavuze ko u Rwanda ruzakomeza gukora ibishoboka byose kugira ngo rurinde umutekano warwo, kandi ko rutazateshuka ku nshingano zarwo nk’Igihugu, zo kurinda abaturage barwo kubera igitutu cyangwa ibihano rufatirwa n’ibihugu runaka.