Urugaga rw’abahanga mukubara, kugena, no kugenzura ibiciro n’amasezerano muby’ubwubatsi (RIQS) basabwe gukora kinyamwuga nyuma yo kuba urugaga rudashamikiye ku bandi.
Ikigo gishinzwe abahanga mukubara, kugena, no kugenzura ibiciro n’amasezerano muby’ubwubatsi, cyakoreraga mu kigo gishinzwe gutegura ibishushanyo mbonera (Rwanda Institute Architects), nyuma yo guhabwa ububasha na Minisiteri y’ibikorwa remezo bwo kuba cyatangira gukora, cyahisemo gukora cyonyine kugirango imirimo yacyo igaragare kurushaho.
Bamwe mubagize uru rugaga twaganiriye bavuze ku mpamvu nyamukuru yo kuba uru rugaga rushatse gukora ukwarwo rutivanze n’izindi.
Ishimwe Lillian avuga ko uru rugaga ruzabafasha kujya biga imishinga neza kuburyo idahomba.
Yagize ati ” uru rugaga ruje gufasha uruganda rw’imyubakire kugena agaciro k’imishinga runaka kuko hari imwe igenda irangira ihenze cyane bitari ngombwa, kuko hari bamwe bayize batayifitiye ubushobozi n’ubumenyi. Uru rugaga rero ruje gukemura icyo kibazo kugira ngo imishinga izaza mu gihe kiri imbere izabashe gukorwa neza mu igenagaciro ryagenwe, kandi ihura nibyo umukiriya yifuje”.
Sheja Didier nawe avuga ko aho bari bageze ubu badakwiriye kuba ishami rito rikorerwa muzindi ngaga.
Ati” Impamvu twahisemo gushinga urugaga twabonaga tumaze kugera ku mubare uhagije kuburyo tutari dukeneye kuba turi ishami rito ry’izindi ngaga, kuko n”ubundi mu uburyo mpuzamahanga buri mwuga ugira urugaga rwawo”.
Lugira Charles umuyobozi mukuru w’ikigo gishinzwe avuga ko hari byinshi baje gufasha kubijyanye n’ibikorwa remezo.
Yagize ati” Uru rugaga ruzavugira abanyamuryango barwo, tuzasaba amategeko tubona atugonga ahindurwe, kuko Leta yashoye amafaranga menshi cyane mu kwigisha abana n’abanyarwanda uyu mwuga kubera Impamvu z’uko ihomba amafaranga menshi cyane mu mishinga”.
Minisiteri w’ibikorwa remezo Dr, Erneste Nsabimana avuga ko iki kigo gifite uruhare runini mu bwubatsi, anabasaba gukora kinyamwuga.
Yagize ati” Uko igihugu gitera imbere niko kigira imishinga minini, namwe niko mugenda mugira akazi kenshi. Ibyo byose nibyo bizatuma tugira imishinga n’ubwubatsi dushaka bifite uburambe kandi byujuje ubuziranenge.”
Mu nshingano iki kigo gifite harimo ubushakashatsi kungano n’agaciro k’ibikorwa remezo, mubyo gitangiranye harimo kugira uruhare mw’iterambere rirambye ry’igihugu mu guteza imbere no kurinda amahame y’ubwubatsi na serivise zishinzwe gutanga amasoko kuri banyirimishinga y’ubwubatsi, inzego za Leta n’abafite aho bahuriye n’ibikorwa remezo.
Kanda hano usome indi nkuru yacu mu mashusho
M.Nyandwi Marie Louise