Menya uko wakwirinda indwara y’umutima

Indwara y’umutima iri mu cyiciro cy’indwara zitandura, zigira ingaruka z’ubuzima mu gihe kirekire, kandi akenshi zigatuma hakenerwa ubuvuzi bw’igihe kirekire.

Icyegeranyo cyakozwe n’Ishami ry’Umuryango w’Abibumbye ryita ku Buzima (OMS) cyo mu 2023, cyerekana ko indwara zitandura ari ikibazo gikomeye cy’ubuzima mu Rwanda. Cyerekana kandi ko umubare w’abapfa bitewe n’indwara zitandura bari mu byiciro by’ingenzi birimo indwara z’umutima, Kanseri na Diyabete.

Mu nama mpuzamahanga ku ndwara zitandura yateraniye i Kigali kuva ku wa 13-15 Gashyantare 2025, Dr. Tedros, Umuyobozi Mukuru wa OMS, yashimye intambwe ifatika u Rwanda rumaze gutera muri urwo rugamba rwo kurwanya indwara zitandura, harimo n’iy’umutima.

Indwara y’umutima mu Rwanda ihagaze ite?

Indwara y’umutima kimwe n’izindi ndwara zose zitandura, Leta y’u Rwanda yashyize mu bikorwa ingamba zikomeye mu kurwanya indwara y’umutima; aho twavuga nko kuzamura imisoro ku itabi n’inzoga, ubukangurambaga mu itangazamakuru ku byo itabi ryangiza mu mubiri, kutemerera ibitangazamakuru kwamamaza itabi n’inzoga, gushishikariza Abaturarwanda gukora siporo, no kurya indyo yuzuye mu rwego rwo guhashya iyo ndwara.

Ni gute wakwirinda indwara y’umutima?

1. Kurya indyo yuzuye: irimo ibyubaka umubiri, ibirinda indwara ndetse n’ibitera imbaraga. Aho twavuga: imbuto nyinshi, imboga, ibinyampeke n’ibindi. Haranira kurya ibiryo biva mu mazi nk’amafi, indagara cyangwa inkoko. Ubushakashatsi bwerekana ko bifite akamaro kanini mu mubiri kurusha inyama zitukura (inka, ihene, n’ibindi).

• Gabanya kurya umunyu mwinshi: umunyu mwinshi cyane cyane utatekanywe n’ibiryo utera umuvuduko w’amaraso, bikaba byavamo indwara y’umutima, kandi ugabanye isukari itunganyijwe mu nganda.

• Gukora imyitozo ngororangingo mu buryo buhoraho: imyitozo ngororangingo ni ingenzi cyane mu kugira ubuzima bwiza, kuko umutima n’uruhu, kimwe n’izindi ngingo zose, zikenera gukora imyitozo. Niba wenda ukuze udashoboye gukora siporo iruhije; gerageza ukore siporo yoroheje mu gihe cy’iminota nibura 150 buri cyumweru, urugero nko kugenda n’amaguru.

• Shyiraho ingamba zihoraho zo guhangana n’imihangayiko (stress) ya buri munsi: Mu buzima bwacu bwa buri munsi duhura n’ibintu byinshi biduhangayikisha; ariko kandi imihangayiko idashira ishobora gutuma umuntu arwara indwara y’ubuhumekero n’umuvuduko w’amaraso ukabije, nyuma bikamutera indwara y’umutima.

• Gusinzira no kunywa amazi ahagije: Ubushakashatsi bwinshi bugaragaza ko kunywa amazi ahagije bigabanya ibyago byo kurwara umutima. Iyo ufite amazi menshi bituma umutima wawe usohora amaraso mu mitsi yawe utavunitse, kandi ukajya kuyakwirakwiza mu bindi bice by’umubiri. Gusinzira bihagije ni ingenzi kuko iyo umuntu adasinzira bihagije bituma agira ibyago byo kurwara umuvuduko w’amaraso, rero na wo ukaba ushobora gutera indwara y’umutima.

• Dore bimwe mu bimenyetso by’uko waba ufite indwara y’umutima

Niwibonaho cyangwa undi muntu uri hafi yawe ibimeyetso bikurikira; shaka ubuvuzi bwihutirwa:

• Kubabara mu gatuza cyangwa guhangayika (gukabya).
• Guhumeka nabi.
• Kugira intege nke cyangwa ubute, cyane cyane ku ruhande rumwe rw’umubiri.
• Kubabara mu ijosi, mu muhogo cyangwa mu mugongo.

Irene Nyambo