Mu minsi yashize hacicikanye ku mbuga nkoranyambaga videwo z’uwitwa USANASE Sharon uzwi ku izina rya Jacky, zumvikanamo amagambo yiganjemo ibitutsi, ubwiyandarike, gusebanya n’ibindi byinshi bibi, ibintu byaje gutuma afungwa na RIB, gusa ku munsi w’ejo tariki09/12/2024 yaje gufungurwa.
Umuvugizi w’Urwego rw’Igihugu rw’Ubugenzacyaha,RIB, Dr. MURANGIRA B. Thierry, mu kiganiro yagiranye n’umunyamakuru Chita kuri Kigali Magic yemeje ko ku itariki 05 Ukuboza 2024, RIB yataye muri yombi Jacky, akaba ari kugenzwaho ibyaha byo gukora ibikorwa by’urukozasoni mu ruhame, gutangaza amakuru y’urukozasoni hakoreshejwe mudasobwa, gutukana mu ruhame no gushyira ahagaragara amashusho yerekeranye n’imikoreshereze y’ibitsina.
Ni kenshi abantu barangwaho bene ibi byaha bagaragaye cyangwa bumviswe, bamwe bagafatwa bakagira ibyo babazwa, abandi ntiwumve bakurikiranwa. Uko abantu bagenda barushaho kumenya no gukoresha imbuga nkoranyambaga, umubare wabo ugenda wiyongera.
Mu muco nyarwanda ibi bibonwa nko guta umuco, ko bidakwiye na gato. Abo bigaragayeho babonwa nk’abananiranye, abafite uburere buke, ibirara n’ibyomanzi. Ku rundi ruhande, abavura indwara zo mu mutwe bo babibona ukundi.
Avuga kuri bene iyi myifatire igaragara cyane cyane mu rubyiruko, Dr. Patrick RWAGATARE, nk’uko bigararaga mu Kanyamakuru ka HDI, yagize ati: “Ibi biterwa ahanini n’impinduka mu buzima bw’urubyiruko, gutakaza icyerekezo cy’ubuzima, gukura imburagihe, ingaruka zo gukoresha ibiyobyabwenge, n’ikoreshwa ridakwiye ry’imbuga nkoranyambaga zimwe na zimwe.”
Yanavuze kandi ko ibi ari nabyo usanga bitera uru rubyiruko indwara zirimo agahinda gakabije (depression) n’umuhangayiko ukabije (anxiety).
Uwitwa Lionel yagize ati: “mbona dufata ubuzima bwo mu mutwe nk’ikibazo kireba umuntu ku giti cye, nyamara ni ikibazo gikomeye ku gihugu. Umuti wadufasha vuba ni ukohereza abafite ubumenyi buhagije mu by’ubuzima bwo mu mutwe mu midugudu, bagakorana n’abaturage bya hafi ku buryo babagirira icyizere, bakabagana kandi nabo bakamenya ibibazo dufite hakiri kare kuko bari hafi yacu, bityo bikaborohera kutwegera no kumenya uko bagomba kudufasha.”
Ni nako abareba kure barimo Mwarimu HAKIZIMANA Marius bakunze gusaba ko muri buri kigo cy’ishuri, mu bigo bya Leta cyangwa abikorera n’ahandi hose mu kazi, haba hari umukozi ushinzwe iby’ubuzima bwo mu mutwe kugira ngo hakurikiranwe abafite ibibazo kandi hanakumirwe ibyaha bishobora kuviramo abafite ubwo burwayi gutakaza amashuri yabo cyangwa akazi kabo.
IRAGENA Alice,umukozi wa Women’s Actions for Green Economy,yagize ati “Mu kazi duhuriramo n’ibintu byinshi bidukomeretsa, byakwiyongera ku byo tugira mu ngo ugasanga bigize ingaruka ku musaruro dutanga mu kazi. Ntekereza ko ari kimwe n’abana n’abarimu ku mashuri. Hose hakenewe abajyanama mu by’ubuzima bwo mu mutwe.”
Itegeko Ngenga ryerekeye imiburanishirize y’imanza nshinjabyaha N° 027/2019 ryo kuwa 19/09/2019, mu ngingo yaryo ya 82, rivuga ko iyo bikemangwa ko ukekwaho icyaha afite uburwayi bwo mu mutwe, Urukiko rutegeka ko asuzumwa na Muganga w’inzobere mu buvuzi bw’indwara zo mu mutwe kugira ngo hamenyekane uko ubuzima bwe bwo mu mutwe buhagaze. Ingingo ya 81 y’iri tegeko yo ikavuga ko iyo bigaragaye ko uwakoze icyaha yari afite uburwayi bwo mu mutwe, akaba atamenya neza ibijyanye n’ibikorwa bye cyangwa tabasha kubiyobora, adashobora gufatwa nk’uwakoze icyaha. Icyo gihe Urukiko rutegeka ko ashyirwa mu kigo cyita ku bafite uburwayi bwo mu mutwe kugira ngo avurwe. Iyo bigaragaye ko yakize nyuma y’igihe, ashobora gusubizwa mu buzima busanzwe, ariko agakurikiranwa mu buryo bwihariye.
Tugirimana Jean Paul
