Ikipe ya APR FC yanyagiye Rayon Sports ibitego 4-1, yegukana igikombe kiruta ibindi cya ‘FERWAFA Super Cup’ 2025, mu mukino wari wavugishije benshi wabaye ku mugoroba wo ku wa Gatandatu tariki 10 Mutarama 2025.
Ni umukino watangiranye imbaraga nyinshi, ariko ukabona ikipe y’Ingabo z’Igihugu ari yo irusha Rayon Sports gusatira, ibi byaje no kuyihira kuko ku munota wa 18 w’umukino APR FC yafunguye amazamu, ku mupira umunyezamu Kwizera Olivier yafashe nabi uramucika, William Togui wari uhagaze neza awutera mu izamu.
Mbere y’uko igice cya mbere kirangira, ku munota wa 43, APR FC yabonye igitego cya kabiri cyatsinzwe na Ronald Ssekiganda n’umutwe ku mupira wahinduwe mu rubuga rw’amahina na Memel Dao. Igice cya mbere kirangira APR FC iri imbere ya Rayon Sports n’ibitego 2-0.
Igice cya kabiri cyatangiye n’ubundi APR FC ikina neza, bituma ku munota wa 70 APR FC ibona igitego cya gatatu ku mupira Dauda Yussif yateye Yannick Bangala arawugarura, Douda arawusubirana yinjira mu rubuga rw’amahina, aroba umunyezamu Kwizera Olivier, inshundura zinyeganyega uko.
Mu minota ya nyuma y’umukino, Rayon Sports yaje kwinyara mu isunzu, maze ku munota wa 93 (muri 5 y’inyongera) ibona igitego cy’impozamarira cyatsinzwe na Ndikumana Asman.
Ku munota wa 95, APR FC yabonye igitego cya kane ku mupira Ruboneka Bosco yinjiranye mu rubuga rw’amahina, acenga umuzamu Kwizera yitura hasi, awuhereza Mamadou Sy wari uhagaze neza ahita awushyira mu rushundura, umukino urangira APR FC itsinze Rayon Sports ibitego 4-1, yegukana FERWAFA Super Cup gutyo.
