Kuri uyu wa Gtanu tariki 24 Nyakanga 2026, Madamu Jeannette Kagame yafunguye ku mugaragaro Imbuto Hub, ikigo cyubatswe mu Karere ka Bugesera n’Umuryango Imbuto Foundation ku bufatanye n’aka Karere, gifite intego yo gukura urubyiruko mu bwigunge, binyuze mu mahugurwa no kugaragaza impano bikaba byabateza imbere.
Iki kigo kimaze amezi atatu gitangite gukoreshwa, cyubatse mu buryo butuma habera ibikorwa byinshi icyarimwe, cyane ko ari inyubako zisanzuye ndetse n’ibibuga by’imikino.
Mu bishobora kuhakorerwa harimo kubyina Kinyarwanda, isomero, imyitozo ngororamubiri, imikino njyarugamba, umupira w’amaguru, basketball, handball, irerero ry’abana, ibyumba byigishirizwamo imyuga itandukanye nko kogosha, gusuka n’ubudozi.
Hari kandi icyumba gifasha urubyiruko mu ikoranabuhanga, ndetse n’icyumba cy’ubujyanama ku buzima n’imibereho myiza.
Madamu Jeannette Kagame akaba n’Umuyobozi Mukuru w’Umuryango Imbuto Foundation, yashimye abafatanyabikorwa bafashije mu kubaka Imbuto Hub mu Karere ka Bugesera.
Yagize ati “Iyi hub muyibonemo imbaraga zanyu, ubumuntu bwanyu n’ubwitange bwanyu. Iyo tureba izi nyubako, izi gahunda n’ibyishimo biri mu maso y’abana n’urubyiruko, tubona umusaruro w’ubufatanye bwanyu. Ibyo mukora ntibizapfa ubusa.”
Madamu Jeannette Kagame yavuze kandi ko hari impamvu gutangiza Imbuto Hubs, byahuriranye n’ukwezi u Rwanda rwizihizamo Kwibohora ku nshuro ya 32.
Ati “Kwibohora si umunsi umwe, ni urugendo rwa buri wese, rwa buri munsi, rwo kubaka umuturage ushoboye, wifitiye icyizere kandi ufite uruhare mu iterambere ry’umuryango we n’Igihugu muri rusange.”
Muri rusange Imbuto Hub ifasha mu gutanga amahugurwa ajyanye n’imyuga itandukanye, guteza imbere siporo, uburezi, kwita ku bana bato ndetse na serivisi z’ubujyanama ku buzima n’imibereho myiza n’ibindi.
Mu mezi atatu ashize kuva Imbuto Hub yatangira gukora, yakiriye nibura urubyiruko 200 ku munsi. Muri icyo gihe, abantu barenga 960 bamaze gukoresha isomero, 875 bahawe serivisi z’ubujyanama ku buzima n’imibereho myiza, 117 bakora imyitozo ngororamubiri ku buryo buhoraho, mu gihe abana 1,402 bamaze gukoresha irerero ry’abana.
Imbuto Foundation itangirije Imbuto Hub mu Karere ka Bugesera, ariko ifite gahunda y’uko kubaka ibigo nk’ibi yakomereza mu turere twose tw’u Rwanda.
