Aba Ofisiye 38 bo mu nzego zinyuranye z’umutekano bo mu bihugu 10 bya Afurika, basoje amasomo y’imiyoborere y’icyiciro cya 14, akaba yaberaga mu Ishuri Rikuru rya Polisi riri mu Karere ka Musanze.
Iki cyiciro cyari kigizwe na 23 b’Abanyarwanda na 15 baturutse mu bindi bihugu bya Afurika. Mu Banyarwanda harimo Abapolisi, abo mu rwego rw’u Rwanda rushinzwe Igorora (RCS), Urwego rw’Igihugu rw’Iperereza (NISS) ndetse n’Urwego rw’Igihugu rw’Ubugenzacyaha (RIB).
Aba bose bahawe impamyabumenyi zabo kuri uyu wa Gatanu tariki 19 Kamena 2026, igikorwa cyitabiriwe na Minisitiri w’Uburezi, Joseph Nsengimana, abayobozi batandukanye barimo n’abahagarariye inzego z’umutekano muri bimwe mu bihugu bya Afurika ndetse n’abafatanyabikorwa b’iri shuri.
Amasomo bahawe agizwe n’ibyiciro bitatu by’ingenzi, harimo ajyanye n’ubuyobozi n’imicungire ya Polisi (Police Command and Staff Component), ay’icyiciro cya gatatu cya kaminuza (Postgraduate Course) mu buyobozi n’imicungire y’ibigo, hamwe n’urwego rw’ubushobozi bwo gufata ibyemezo (Strategic Leadership and Management) ndetse na gahunda y’icyiciro cya kabiri cya kaminuza (Master’s Degree) mu masomo yerekeranye n’amahoro no guhindura amakimbirane mu buryo bwubaka (Peace Studies and Conflict Transformation).
Umuyobozi Mukuru w’Ishuri Rikuru rya Polisi, CP Christopher Bizimungu, yavuze ko aya masomo ari gahunda y’umwaka umwe itangwa n’Ishuri Rikuru rya Polisi ku bufatanye na Kaminuza y’u Rwanda ndetse na African Leadership University.
CP Bizimungu yasabye abarangije aya masomo gukoresha neza ubumenyi n’ubushobozi bungutse mu nshingano zabo za buri munsi.
Yagize ati “Mugiye gusubira mu nshingano zanyu, mujye mwibuka ko mufite inshingano zo gukora akazi mu buryo burushijeho kuba bwiza kandi bwa kinyamwuga. Mwungutse ubumenyi n’ubushobozi byinshi, kandi ibyo bikwiye kugaragarira mu myitwarire no mu bikorwa byanyu.”
Minisitiri w’Uburezi, Joseph Nsengimana, yashimiye abarangije aya masomo ku bwitange n’umuhate bagaragaje mu gihe cy’umwaka bamaze bahugurwa, abasaba gukomeza kurangwa n’umuco wo kwiga no kwiyungura ubumenyi mu buzima bwabo bw’umwuga.
Yagize ati “Kurangiza amasomo si iherezo ryo kwiga, ahubwo ni intangiriro y’indi ntambwe nshya. Imiterere y’umutekano irimo guhinduka ku muvuduko munini. Buri munsi havuka ibibazo bishya, ikoranabuhanga rigatera imbere, abanyabyaha bagahindura uburyo bakoramo, na sosiyete ikagenda ihinduka. Nk’abayobozi, mugomba gukomeza kwiga, gukura no guhuza imikorere yanyu n’ibihe.”
Ati “Izi si impamyabumenyi zisanzwe muhawe, zigaragaza ubwitange, kwigomwa no guharanira kuba indashyikirwa. Ndashimira buri wese muri mwe kuba ageze kuri iyi ntambwe ikomeye.”
Abanyeshuri bo mu bihugu by’amahanga basoje aya masomo ni abo muri Eswatini, Malawi, Santrafurika, Sudani y’Epfo, Somalia, Gambia, Uganda, Namibia na Kenya.
