Abaturage b’abasivili 45 baguye mu gitero cy’umutwe w’abarwanyi wa RSF uhanganye na Leta ya Soudan, abandi 35 barakomereka bikabije.
Icyo gitero cyabaye ku Cyumweru tariki 13 Nyakanga 2025 nubwo byatangajwe ku mugoroba wo ku wa Mbere, aho cyibasiye umudugudu wa Oum Garfa muri Leta ya Kordofan-Nord, abo barwanyi bakaba barasahuye abaturage ndetse banabatwikira inzu zabo, nk’uko byatangajwe na ‘Emergency Lawyers’, umuryango ukurikirana ihohoterwa rikorerwa abaturage kuva intambara hagati y’abasirikare ba Leta ya Soudan na RSF yatangira.
Uwo mudugudu wagabweho igitero uri iruhande rw’umuhanda w’ingenzi werekeza i Khartoum ku murwamukuru wa Soudan, ku bilometero 250, umudugudu ingabo za Leta zari zarisubije nyuma y’aho wari warigaruriwe na RSF, bituma uyu mutwe ugaba ibitero mu tundi duce tw’igihugu.
Urutonde rw’abishwe umuryango Emergency Lawyers woherereje igitangazamakuru AFP, rugaragaraho abana n’abagore mu bibasiwe n’icyo gitero.
Umuryango mpuzamahanga wita ku bibazo by’impunzi, OIM, watangaje ko abantu 3,000 bahunze imirwano muri ako gace, bahungira mu mujyi wa Bara uri hafi y’aho bari batuye, ukaba ari umujyi uri mu maboko ya RSF.
Iyi ntambara hagati ya Leta ya Soudan n’umutwe wa RSF imaze imyaka irenga itatu, ikaba imaze guhitana abantu basaga ibihumbi 10, ndetse abandi amamiliyoni bakaba barataye ibyabo barahunga.
Ni intambara ihanganishije General Abdel Fattah al-Burhan, ukuriye ingabo za Leta ya Soudan na Mohamed Hamdan Dagalo, uyobora umutwe wa RSF.
