Igisirikare cya Nigeria cyatangaje ko ishami ryacyo rirwanira mu kirere (Nigeria Air Force), ryagabye igitero gikomeye kandi cy’ubuhanga budasanzwe ku barwanyi ba Boko Haram cyicamo abagera kuri 35, mu majyaruguru y’uburasirazuba bw’iki gihugu.
Icyo gitero cyabaye mu ijoro ryo ku wa Gatandatu tariki 23 Kanama 2025, cyabereye ahitwa Kumshe muri Leta ya Borno, hafi y’umupaka hagati ya Nigeria na Cameroun, nk’uko byatangajwe na Ehimen Ejodame, umuvugizi w’ingabo za Nigeria zirwanira mu kirere.
Umutwe wa Boko Haramu watangiye mu 2009, ukaba ufatwa nk’umwe mu mitwe izwiho ubwicanyi ndengakamere ku Isi, aho ugendera ku mahame akarishye y’idini rya Islam.
Ubwo bwumvikane buke mu majyaruguru ya Nigera, bwanageze mu gihugu gituranyi muri ako gace cya Niger, bikaba byaratumye abasivili bagera ku bihumbi 35 bicwa, abandi bagera kuri miliyoni 2 bata ingo zabo, nk’uko byemezwa n’Umuryango w’Abibumbye.
Uretse icyo kibazo cya Boko Haram kiri mu majyaruguru y’iburasirazuba ya Nigeria, iki gihugu gikomeje guhangana n’indi mitwe yitwaje intwaro, iherereye mu majyaruguru yo hagati n’ay’iburengerazuba.
