U Rwanda n’u Bubiligi byongeye gusubukura umubano w’ubucuti n’ubutwererane, nk’uko bigaragara mu itangazo ryashyizweho umukono n’abahagarariye impande zombi, ryagiye ahagaragara ku mugoroba wo kuri uyu wa Kabiri tariki 22 Nzeri 2026.
Ni itangazo ryashyizweho umukono na Minisitiri w’Ububanyi n’Amahanga n’Ubutwererane Olivier Nduhungirehe ku ruhande rw’u Rwanda, na Maxime Prevot, Minisitiri w’Intebe wungirije akaba na Minisitiri w’Ububanyi n’amahanga ku ruhande rw’u Bubiligi.
Iryo tangazo rivuga ko hashingiwe ku ngingo ya 2 y’Amasezerano ya Vienne yerekeye umubano w’ububanyi n’amahanga, u Bubiligi n’u Rwanda byafashe hamwe icyemezo, ku itariki ya 22 Nzeri 2026, cyo kongera kubaka umubano w’ububanyi n’amahanga.
Kubera iyo mpamvu, Ambasade z’ibihugu byombi zizongera gufungurwa mu gihe cya vuba. Mu ntangiriro, buri ambasade izayoborwa n’uhagarariye igihugu by’agateganyo ushinzwe ibikorwa by’ambasade (chargé d’affaires ad interim), afatanyije n’umudipolomate cyangwa umukozi ushinzwe ibibazo bya konsula ndetse n’itsinda rito ry’abakozi bashinzwe ubufasha mu bya tekiniki.
Nyuma yaho, hazatangwa ibisabwa kugira ngo Ambasaderi w’igihugu runaka yemererwe guhagararira igihugu cye mu kindi, mu rwego rwo gutegura impinduka zizakorwa mu bahagarariye ibihugu mu mahanga.
Hazashingirwa ku ihame ry’uko Ambasaderi w’u Rwanda mu Bubiligi azanahagararira u Rwanda mu Muryango w’Ubumwe bw’u Burayi (EU).
Iki cyemezo gifashwe nyuma y’inama zitandukanye n’ibiganiro bitari ku mugaragaro byahuje, mu mezi ashize, Minisitiri w’Ububanyi n’Amahanga w’u Rwanda na Minisitiri w’Ububanyi n’Amahanga w’u Bubiligi.
Muri ibyo biganiro, ibibazo bitandukanye byari bitumvikanwaho ndetse n’ubwumvikane buke hagati y’ibihugu byombi, byaganiriweho mu buryo bwubaka.
Muri urwo rwego, u Rwanda n’u Bubiligi birashimira byimazeyo ubuyobozi bwa Leta ya Qatar, bwagize uruhare mu korohereza inama ya mbere yahuje ba Minisitiri bombi b’Ububanyi n’Amahanga, yabereye i Doha muri Kamena 2025.
U Bubiligi n’u Rwanda byongeye gushimangira ubushake bwabyo bwo gukomeza ibiganiro bifunguye, bivugisha ukuri kandi bisobanutse, kuko byemeranya ko ari ingenzi mu gukemura ibibazo bishobora kuvuka hagati y’ibihugu byombi, ndetse no kuganira ku myumvire itandukanye n’ibibazo bitarakemuka ku bibazo bireba umuryango mpuzamahanga.
Ibihugu byombi kandi byemeranyije ku mahame mashya azayobora umubano wabyo mu gihe kiri imbere, arimo kutivanga mu bibazo by’imbere mu gihugu cy’ikindi, kubahana no gukorana mu buryo bwubaka.
Umubano w’u Rwanda n’ub’u Biligi wari warahagaze kuva muri Werurwe 2025.
