Muri Afghanistan, abantu 79 barimo abana 17 baguye mu mpanuka yo mu muhanda, yatewe na bisi yagonganye n’ikamyo ndetse na moto, nk’uko ubuyobozi muri icyo gihugu bwabitangaje.
Abapfuye ahanini ni Abanya-Afghanistani bari barahungiye muri Iran bihana imbibi, iki gihugu cyari cyohereje ngo basubire mu gihugu cyabo, muri urwo rugendo ni bwo habaye iyo mpanuka, aho bisi barimo yahise ishya irakongoka ku buryo nta warokotse, ndebe n’abari mu ikamyo no kuri moto bakaba bahise bahasiga ubuzima, nk’uko Ahmadullah Mottaqi, umuyobozi ushinzwe amakuru n’umuco i Herat aho iyo mpanuka yabereye, yabitangarije BBC.
Polisi y’aho i Herat, yatangaje ko iyo mpanuka yatewe n’umushoferi wari utwaye iyo bisi wagenderaga ku muvuduko ukabije, ndetse no ku burangare.
Impanuka zo mu muhanda aho muri Afghanistan ngo ziraba kenshi, bitewe n’imihanda yangiritse bikabije kubera umutekano muke umaze igihe muri iki gihugu, ndetse n’amategeko y’umuhanda atubahirizwa.
Abanya-Afghanistan amamiliyoni bari barahungiye muri Iran na Pakistan kuva mu 1970, ariko biba akarusho ubwo Abasoviete bigabizaga Afghanistan mu 1979, ndetse no mu 2021 ubwo Abatalibani bisubizaga ubutegetsi bw’iki gihugu.
Kuva Abatalibani basubira ku butegetsi bwa Afghanistan, Iran na Pakistan byakomeje gusaba izo mpuzi gusubira mu gihugu cyazo, bigera n’aho kugeza ubu zirimo zicyurwa ku ngufu.
Leave feedback about this