Ikipe y’Igihugu y’u Rwanda, Amavubi, yatsinze iya Cap-Vert ibitego 2-1, ihita iyobora itsinda K irimo, ryo gushaka itike y’Igikombe cya Afurika cya 2027 n’amanota 6/6, mu mukino wabereye i Praia, umurwa mukuru wa Cap-Vert, kuri uyu wa Kabiri tariki 29 Nzeri 2026.
Umukino watangiranye imbaraga nyinshi ku ruhande rwa Cap-Vert, ikagerageza kurema uburyo bw’ibitego imbere y’izamu ry’Amavubi, ariko umuzamu Ntwali Fiacre akababera ibamba.
Cap-Vert yari imbere y’abafana bayo, yakomeje kwiharira umupira mu ntangiriro z’umukino, bituma ku munota wa gatatu ibona coup-franc ku ikosa Bizimana Djihad yakoreye Ayoni Santos, gusa ntacyo yatanze.
Ku munota wa 40, Cap-Vert yabonye igitego, ubwo abakinnyi bayo bazamukanaga umupira ku ruhande rwa Rain Mendes, awuhinduye usanga rutahizamu Banchimol ahagaze neza awohereza mu rushundura.
Ku munota wa kabiri w’inyongera mbere y’uko igice cya mbere kirangira, Niyomugabo Claude yatsinze igitego cyiza, ku ishoti rikomeye yatereye inyuma y’urubuga rw’amahina, umupira yari ahawe na Joy-Lance Mickels, bajya kuruhuka ari igitego 1-1.
Igice cya kabiri cyatangiye Amavubi asatira cyane, biza no kuyahira kuko ku munota wa 52, Iradukunda Elie Tatou wari winjiye asimbuye Biramahire Abeddy, yatsinze igitego cya kabiri ku mupira wahinduwe na Joy-Lance Mickels, nuko Amavubi ayobora umukino n’ibitego 2-1.
Cap-Vert nyuma yo gutsindwa igitego cya kabiri, yongereye imbaraga mu gusatira ngo irebe ko yakigombora, ariko abakinnyi b’Amavubi ntibayorohera nubwo mu minota ya nyuma bagiye bakora amakosa yashoboraga gutuma batsindwa, ariko bakomeza kwihagararaho.
Impande zombi zakomeje gukina zishaka igitego, ari na ko zikora impinduka zitandukanye mu kibuga, gusa iminota 90 y’umukino ndetse n’iy’inyongera irangira nta gihindutse, u Rwanda rwegukana intsinzi y’ibitego 2-1, uba umukino wa kabiri rutsinze mu gushaka itike ya CAN 2027, nyuma y’uko rutsinze Liberia ibitego 3-1, mu mukino wabereye i Kigali.
Kuba u Rwanda rwatsinze uyu mukino, byatumye ruyobora itsinda K ruherereyemo, rukaba ruzongera gukina mu kwezi k’Ugushyingo, aho ruzahangana na Mali mu mikino ibiri.
Jean Claude Munyantore
